Kimolos

Kimolos është një ishull i vogël dhe autentik i Cikladeve, që ruan karakterin e tij tradicional, larg turizmit masiv. Ai bën pjesë në grupin e Cikladeve Perëndimore dhe ndodhet pranë Milos, duke u dalluar për atmosferën e qetë, arkitekturën e bardhë dhe plazhet me ujëra të gjelbërblu. Bukuria e Kimolos qëndron në thjeshtësinë e saj: rrugica të kalldrëmuara, shtëpi të ulëta, ritme të qeta jetese dhe banorë mikpritës. Është ideale për udhëtarët që kërkojnë qetësi dhe kontakt me natyrën.

Kimolos lidhet me traget me portin e Pireut, kryesisht përmes linjave që kalojnë edhe nga ishujt e tjerë të Cikladeve Perëndimore. Koha e udhëtimit varion nga 6 deri në 6,5 orë me anije konvencionale, varësisht nga ndalesat dhe kompania. Ekziston gjithashtu një lidhje javore me portin e Lavriut, që zgjat 15 orë e 30 minuta.

Chorio (fshati)

Kryeqyteti i ishullit është Chorio. Nga Chorio, vizitorët shijojnë pamje të mrekullueshme të detit dhe portit të Psathit. Bëhet fjalë për një vendbanim tradicional me rrugica të ngushta, shtëpi të bardha dhe sheshe të vogla. Këtu rreh zemra e ishullit, me kafene, tavernë dhe dyqane të vogla me produkte lokale, ndërsa Kalaja mesjetare e shekullit XIV-XV, me rrugicat e ngushta që duken si labirint, ofron për vizitorët një ndjesi unike historie dhe të kaluarës.

Përveç Chorio, ekzistojnë dhe vendbanime të tjera të vogla që ia vlejnë të vizitohen, si Goupa, me plazhin e qetë, “sirmata” shumëngjyrëshe, shpella të gdhendura në shkëmb dhe anijet e peshkimit të fshatit. Gjithashtu, vendbanime më të vogla si Karras, Prassa dhe Agios Nikolaos banojnë kryesisht gjatë muajve të verës dhe janë destinacione ideale për shëtitje të qeta.

Për lëvizjet në ishull mund të përdorni autobuset lokale, të cilat përmes linjave të shpeshta lidhin Psathin me Chorio dhe disa plazhe. Në ishull ka gjithashtu opsione për të marrë me qira makinë, motor ose ATV, si dhe shërbim taksie. Edhe pse qarkullimi i automjeteve është i lejuar përgjithësisht në të gjithë ishullin, një pjesë e Chorio bëhet vetëm për këmbësorë në orët e mbrëmjes gjatë muajve të verës, duke ruajtur atmosferën e qetë dhe tradicionale.

Kimolos ka disa nga plazhet më autentike dhe të thjeshta të Cikladeve. Gurë shumëngjyrësh dhe të shkëlqyer dhe ujëra kristal të pastër krijojnë një peizazh të rrallë bukurie dhe qetësie.

Prassa

Një nga plazhet më të njohura dhe mahnitëse të Kimolos, me rërë të bardhë dhe ujëra turkuaz, e njohur edhe si Plazhi i Bardhë. Ndodhet afër Chorio dhe ka çadra dielli dhe një kioskë, pa humbur karakterin natyral.

Bonatsa

Një plazh i qetë dhe i cekët, ideal për familjet me fëmijë. Ka rërë dhe hijen natyrale të tamarisëve. Qasja me makinë është e lehtë, me çadra dielli dhe opsione për ushqim.

Aliki

Plazh i madh dhe me rërë, i njohur për komoditetin dhe hapësirën që ofron, madje edhe në gusht. Ideal për ata që duan të relaksohen larg vendeve të mbushura me njerëz. Qasja është e lehtë dhe plazhi nuk ka infrastrukturë të organizuar, por mund të gjendet hije nën tamarisë.

Rema

Një vend shumë i veçantë pranë Goupas. Në skajin e gadishullit ndodhet “Elefanti”, një formacion natyral shkëmbor që ngjan me një elefant, i gdhendur nga deti dhe era me kalimin e kohës. Pak më larg ndodhen “Sirmata”, shpella karakteristike të gdhendura në shkëmb nga peshkatarët për të ruajtur anijet e tyre gjatë dimrit. Përpara shtrihet Rema, një plazh i vogël me guroje dhe ujëra të qeta gjelbërblu, që duket si një pishinë natyrore, ideal për not të qetë dhe relaks pasdite.

Ellinika

Një nga plazhet më të veçanta të Kimolos, e njohur për qytetin e lashtë të fundosur pak metra larg bregut. Duke notuar me maskë, mund të shihni rrënojat e shtëpive, pusëve dhe pjesë të mureve mikene që i përkasin vendbanimeve të lashta. Plazhi ka një sipërfaqe të madhe rëre dhe ujëra të shkëlqyera.

Kalaja e Kimolos

Kalaja mesjetare në qendër të Chorio është një nga atraksionet më të rëndësishme historike të ishullit. Bëhet fjalë për një vendbanim i fortifikuar i vjetër me rrënoja shtëpish që ruajnë arkitekturën e tyre tradicionale. Shëtitja nëpër rrugicat e saj është si një udhëtim në kohë.

Muzeu Arkeologjik i Kimolos

Ky muze i vogël strehon objekte që tregojnë historinë e ishullit. Kimolos ka një histori të pasur lokale që çdo vizitor duhet ta njohë.

Ekskursion në Polyagos

Nga Psathi organizohen ekskursione me anije rreth ishullit dhe në ishullin e vogël Polyagos, i cili ka plazhe të pabesueshme si Mersini dhe Galazia Nera, me ujëra që kujtojnë Karaibet.

Shëtitje në natyrë

Kimolos është ideale për ecje në natyrë, me shtigje të vogla që çojnë tek kapelat e bukura, gjiret e izoluara dhe pamje që marrin frymën. Rrugët janë të lehta dhe pa vështirësi të mëdha, të përshtatshme për ata që duan të eksplorojnë natyrën e ishullit. Një itinerar i njohur, mes ullishtave dhe vreshtave, shkon nga Chorio në plazhin Ellinika.